O día 18 de xullo, de 10:30 a 14:30, convidámosvos a participar na xornada sobre os Endemismos do centro de Galicia: visita ás serpentinas da serra do Careón, evento realizado co apoio da Deputación da Coruña. Realizaremos unha visita ás diferentes parcelas custodiadas a través dunha pequena ruta de sendeirismo. Como colaboradores no crowdfounding das láminas de flora endémica tedes inscrición preferente na actividade ata o sábado 11 ás 14:00 (logo, será por onde de inscrición ata completar prazas).

A nosa entidade conseguiu nos últimos anos un bo número de parcelas para a conservación das diferentes especies endémicas do centro de Galicia asociadas ás serpentinas da serra do Careón, alcanzando xa máis de 13 ha custodiadas, ás que en breve se sumarán outras 4 ha máis, todas elas derivadas de arrendamentos ó Banco de Terras de Galicia. Do mesmo xeito, e grazas á Deputación da Coruña, imos empezar coa compra e conservación a perpetuidade de parcelas de alto interese ambiental. Este é un proxecto de moito calado, no que estamos invertindo grandes esforzos debido á súa complexidade, pero que suporá un enorme beneficio para a conservación dos microendemismos asociados ás serpentinas do centro de Galicia.

Por isto, gustaríanos invitarvos a asistir a esta visita á zona de actuación e, da man dun botánico e de técnicos da nosa entidade, explicaremos os amplos valores naturais da zona, veremos os diferentes endemismos e comentaremos os obxectivos e logros deste gran proxecto de conservación de flora. Podedes inscribirvos a través da nosa páxina web (www.custodiadoterritorio.org/actividades) e obter información en custodiadoterrirtorio@gmail.comou no 620-59.38.92 (teléfono ou WhatsApp).

Tras o proceso de inscrición indicarémosvos as medidas que se levarán a cabo para evitar contaxios do coronavirus e o punto de reunión para que toda a actividade se desenvolva dun modo seguro e agradable para todos.